Roli i shkencave albanologjike për njohjen e shqipes dhe të Shqipërisë në Itali

Abstrakti

Në këtë shkrim të shkurtër do të flasim për studimet që kanë shënuar përhapjen e njohjes së gjuhës shqipe dhe të Shqipërisë në Itali. Këtu do të kufizohemi vetëm tek studiuesit italianë dhe arbëreshë që janë marrë me botën shqiptare dhe do të lëmë mënjanë veprat kushtuar dialekteve arbëreshe të Italisë. Studimet albanistike në Itali datojnë të paktën që nga fillimi i shekullit XVIII. Tematikat e përfshira janë të shumta. Përveç studimeve në fushën e gjuhësisë, ka studime në fushën e letërsisë, atë etnografike, gjeografike, historike, antropologjike dhe në fushën politike. Ky shkrim nuk ka për qëllim që të përfshijë të gjitha këto fusha, as të hyjë thellë në fushat e përzgjedhura (gjë e pamundur): synimi është t’i jepen lexuesit disa referenca të studiuesve të ndryshëm duke cituar veprat dhe artikujt që në gjykimin tonë janë më kryesore. Përjashtohen këtu veprat historike. Autorët dhe veprat e cituara do të ndahen sipas fushave dhe, brenda çdo fushe, do të ndiqet kriteri kronologjik.